Хөрмәтле Кыям әфәнде Пахалов

Чуашстан мөселманнары Диния нәзарәте һәм аңа багълы булган мәхәлләләр исеменнән Сезне Чуашстан татар милли-мәдәни мохтәрияте рәисе булып сайлануыгыз белән чын ихласылык белән котлыйбыз.

Аллаһы Тәгаләгә мең шөкерләр булсын, Чуашстандагы татар-мөселманнар, үзләренең тырышлыгы, дәүләтнең ышанычы белән, әлегә кадәр матур тормыш корып килделәр. Бу җирлектәге милләттәшләребез, бар татар дөньясына үрнәк булып тордылар. Әлеге казанышларның асылында күп төрле факторлар ятты.

Шуларның төп асылы – ул дин булды. Халкыбыз нинди генә авыр заманнарда да диннән бизмәде, киресенчә, динебезнең йола-гадәтләренә береккән милли традицияләрне саклап һәм үстереп барды. Халкыбыз мәчет-мәхәллә тирәсендә тормышларын көйләп, ана телен, гадәт-йоласын саклады.

Республикадагы татарлар уңышының тагын бер сәбәбе ул - лидерларыбыз булды. Татар милли хәрәкәте гел лидер- әйдәманнардан уңып торды. Фәрит Гыйбатдинов, Рәшит Сәнҗәпов, Рамик Гаделҗановлар милли бердәмлекне алга куеп, фидаиләрәчә милләткә хезмәт итеп килделәр. Диния нәзарәте һәм татар мохтәрияте иңне-иңгә куеп, бер сүз, бер көч булып милли яшәешебезне торгызырга омтылды.

Хөрмәтле Кыям әфәнде, сез, мохтәриятнең яңа рәисе буларак, шушы факторларны истә тотып,  милли яңарыш, милли тормышны көйләү өстендә, җиң сызганып тагы да нык эшләр башкарырсыз дип өмет итәбез.

Чуашстандагы татар милли хәрәкәте өчен Сез яңа кеше түгел. Әлегә кадәр дә, дин һәм милләт эшләрендә Сез иң актив ярдәмчеләребез, таянычыбыз идегез. Моннан тыш, үз хәләл кәсебегез белән тапкан малларыгызны даими милләт юлына сарыф итеп тордыгыз. Күршеләребез чуашлар игътибарына татар классигы Габдулла Тукайның шигырьләр мәҗмугасын тәрҗемә иттереп, бастырып чыгаруыгыз гына да, ни кадәр Сезнең фидакәр икәнлегегезне күрсәтә. Мондый адымнарыгызны тагы да санап китеп булыр иде.

Инде, татар милли-мәдәни мохтәриятенең рәисе булып сайлангач та, беренче программ юнәлешегезне дә ачык итеп белдердегез. Ул - шәһәрләрдәге милли тормышыбызны көйләү. Чуашстан Диния нәзарәте дә, әлеге юнәлештә аерым бер программ эстендә эшләгәндә, милли мохтәрият рәисеннән дә шундый программ юнәлеш  яңгырау – безнең өчен икеләтә шатлыклы булды.

Киләчәктә дә, шушы һәм башка эшләрдә уртак фикердә, Сезгә кадәр мохтәриятне җиткәләгән кадерле кардәшләребез белән бер сафта булып,  милли һәм дини яңарышыбыз юлында бергә-бергә  матур-матур гамәлләр кылырга Аллаһы Тәгалә насыйп итсен.

Тагын бер кат, шушы яңа вазыйфагыз белән Сезне котлыйбыз һәм саулык-сәламәтлек, җан тынычлыгы белән хәерле гамәлләр кылуыбызны һәрбарчабызга телибез.

Мәскәү, Русиянең Үзәк өлеше,

Чуашстан мөселманнары

Диния нәзарәте рәисе,

 Русия Иҗтимагый палатасы әгзасы,

Мөфти                                                   Албир хәзрәт Крганов